- कवि : ईश्वर दत्त जोशी
ए बा ! स्वर्ग र नर्क कहाँ छ ? (गद्य कविता )
.......................
सानो छोरा आजभोलि सधैँ सोध्छ“ए बा !
स्वर्ग भनेको के हो ?”
म भन्छु
“मरेपछि थाहा पाउँछस् ।”
ऊ भन्छ,
“मलाई अहिले चाहिन्छ ।”
मरेपछि स्वर्गको के काम ?१
एकाएक बदमासी गर्दा उसकी आमाले भन्छिन्
“ए छोरा ! बदमासी गरे नर्कमा परिन्छ ।”
ऊ बुरुक्क उफ्रँदै फेरि आउँछ
मेरो लुगाको छेउ तान्दै भन्छ
“ए बा !
नर्क भनेको के हो ?”
म भन्छु,
“मरेपछि थाहा पाउँछस् ।”
ऊ भन्छ,
“मलाई अहिले चाहिन्छ ।”
मरेपछि नर्कको के काम ?२
हुन त हो मरेपछि स्वर्ग न नर्क
तर मेरा पूर्वजले मलाई यहीँ दर्शन सिकाए
अर्को दिन बिहानै छोरो जुरुक्क उठ्छ
मेरो कपाल तान्दै ओछ्यान मै भन्छ
“ए बा !
उठ्नुस् स्वर्ग हेर्न जाऊँ,
हैन भने नर्क हेर्न जाऊँ,
कस्तो रहेछ यो मलाई हेर्न मन लाग्यो ।”
म हाँस्दै भन्छु,“हैन ए भगवान यसरी एकाबिहानै हेर्न जानलाई
चलेको नेपाली सिनेमा हो र ?”
मेरो जवाफले ऊ मुस्कान छर्दै
आमाको पूजाकोठातिर दर्गुन खोज्छ ।३
ठेगाना पुर्चौँडी न पा ७ बैतडी
सम्पर्क ९८६८४५६३१३
ईमेल : ishworjoshi12@gmail.com
Please don't forget to give your valuable suggestions.